My Daily Strength

பின்வரும் சந்ததிக்கு உண்டாகும் ஆசீர்வாதம் -- Rev. Dr. ஜெ. சாமுவேல் சுதாகர்

இன்றைய தியானம் : 'நல்லவன் தன் பிள்ளைகளின் பிள்ளைகளுக்குச் சுதந்தரம் வைத்துப்போகிறான்...' நீதி. 13:22.

ஆபிரகாமை அழைத்த தேவன் அவனுடன் மட்டுமன்றி, அவனுடைய சந்ததியினரோடும் நெருங்கி நடக்க விரும்பினார். விசுவாசத்திலும் கீழ்ப்படிதலிலும் ஆபிரகாம் கடைப்படித்தவைகளை அவனது சந்ததியான ஈசாக்கும் யாக்கோபுங்கூட பின்பற்றினர். தேவன் ஆபிரகாமுக்கு வாக்குப்பண்ணினவைகள் அவனுக்கு மட்டுமன்றி, அவனுடைய சந்ததியான ஈசாக்கு, யாக்கோபு என்பவர்களுடைய வாழ்க்கையிலும் நிறைவேறியது. தேவனுடைய சிநேகிதன் என்று அழைக்கப்பட்ட ஆபிரகாம், அவனுடைய சந்ததியான ஈசாக்குக்கும் யாக்கோபுக்கும் ஒரு சகாப்தத்தை விட்டுச்சென்றான். அது தேவன்மேலுள்ள விசுவாசமும், ஆசீர்;வாதங்களைச் சுதந்தரிப்பதற்கான உத்தமமான வாழ்க்கையுமாகும்.

தேவனுடைய பாதத்தில் காத்திருந்ததும், அவருடைய வார்த்தைக்குக் கீழ்ப்படிதலினால் உண்டாகும் ஐசுவரியமும் ஈசாக்கு, மற்றும் யாக்கோபின் வாழ்க்கையில் தெளிவாய்க் காணப்பட்டன. இன்று நீங்கள் இப்புத்தகத்தை வாசித்து, தேவனுடைய வார்த்தையைத் தியானித்துக் கொண்டிருப்பதன் காரணம். உங்களுடைய பெற்றோர் உங்களுக்காக ஜெபம், மற்றும் தேவபயம் என்கிற சதந்திரத்தை கொடுத்துச் சென்றிருப்பதேயாகும். ஆசீர்வாதத்தின் பாதையில் ஓடத் துவங்கியிருக்கும் நீங்கள் உங்களுக்குப் பின்வரும் சந்ததிக்கும் அதனை கொடுத்துவிட்டுச் செல்லவேண்டும்.

இப்பூமியில் உங்களுக்கு எவ்வளவு ஆசீர்வாதங்கள் தேவைப்படுகின்றனவோ, அதுபோலவே உங்கள் சந்ததியினருக்கும் தேவை. உங்கள் மூலமாக ஏதோவொன்று சம்பவிப்பதை உங்களைச் சுற்றிலுமிருக்கிறவர்கள் காணட்டும். உங்கள் பெற்றோரது ஜெபங்களின்மூலமாக நீங்கள் ஆசீர்வாதங்களோடு பிறந்திருக்கிறீர்கள். அவைகள் உங்கள் வாழ்க்கையோடு முடிந்துவிடக்கூடாது. மாறாக, உங்கள் பிள்ளைகளுக்கும் அவர்களுடைய பிள்ளைகளுக்கும் கடந்துசெல்லட்டும். எனவே, இன்று, ஆபிரகாம், ஈசாக்கு, யாக்கோபு இவர்களுடைய வாழ்க்கையிலிருந்து கற்றுக்கொண்டு, தேவனுக்காக ஆசீர்வாதத்தின் நட்சத்திரமாக ஜொலிக்கும்படி ஒவ்வொரு நாளும் ஆசீர்வாதத்தைப் பெற்றனுபவிக்கத் திட்டமிடுங்கள். அப்பொழுது உங்களைக் காண்கிறவர்கள், 'ஆசீர்வாதத்தின் தகப்பன் இதோ இருக்கிறான்' என்று கூறுவார்கள்.

இவ்வுலகம் உங்களிடத்திலிருந்து திருடமுடியாத செல்வங்கள் எவையெனில், கீழ்ப்படிதலும், அன்பும், விசுவாசமும், தேவன்மேலுள்ள உங்கள் நம்பிக்கையுமே ஆகும். இன்று, உங்கள் ஆசீர்வாதங்கள் உங்கள் சந்ததிக்கு கடந்துசெல்லட்டும்.

ஜெபம் : கர்த்தாவே, என் சந்ததிக்கு ஆசீர்வாதங்களை விட்டுச்செல்ல எனக்கு உதவிசெய்யும். ஆமென்.


சிந்திக்க : ஆசீர்வாதங்களின் திறவுகோல் நமக்குக் கொடுக்கப்பட்டுள்ளது.