My Daily Strength

யோசுவா இஸ்ரவேலரை ஆசிர்வதித்தான் -- Rev. Dr. ஜெ. சாமுவேல் சுதாகர்

இன்றைய தியானம் : 'யோசுவா அவர்களை ஆசிர்வதித்து, அவர்களை அனுப்பிவிட்டான்' யோசுவா 22:6.

மோசேயின் மரணத்திற்க்குப் பின்பு, நுனின் குமாரனாகிய யோசுவா, வாக்குத்தத்தம் பண்ணப்பட்ட தேசத்திற்கு நேராக இஸ்ரவேல் ஜனங்களை நடத்திச் செல்லும்படி கட்டளைப்பெற்றான். யோசுவா அவர்களுக்காக திறப்பாலே நின்றவனாய், இராஜாக்களையும், இராஜ்ஜியங்களையும் ஜெயித்து, அவர்களுடைய தேசங்களைச் சொந்தமாக்கி, கர்த்தருடைய நடத்துதலின்படியே, இஸ்ரேவேலின் கோத்திரங்களுக்கெல்லாம் பங்கிட்டு கொடுத்தான். ' இந்தப் பிரகாரமாகக் கர்த்தர் இஸ்ரவேலுக்குக் கொடுப்பேன் என்று அவர்களுடைய பிதாக்களுக்கு ஆணையிட்ட தேசத்தையெல்லாம் கொடுத்தார்; அவர்கள் அவர்களைச் சுதந்தரித்துக்கொண்டு, அவைகளிலே குடியிருந்தார்கள்' என்று, யோசுவா 21:43 ல் வாசிக்கின்றோம். கர்த்தர் மோசேயைக்கண்டு சொல்லியிருந்த நல்வார்த்தைகளையெல்லாம் ஒன்றும் தவறிப்போகாமல் நிறைவேற்றி, இஸ்ரவேலரைக் குடியமர்த்தினர்.

தேசத்தைப் பங்கிட்டுக் கொடுத்தபின்னர், யோசுவா இஸ்ரவேல் கோத்திரத்தார் அனைவரையும் வரப்பண்ணி, அவர்கள் தங்கள் தேவனாகிய கர்த்தரில் அன்புகூர்ந்து, அவருடைய வாழ்களிலெல்லாம் நடந்து, அவர் கற்பனைகளைக்கைக்கொண்டு, அவரைப் பற்றிக்கொண்டிருந்து, அவரைத் தங்கள் முழு இருதயத்தோடும், தங்கள் முழு ஆத்துமாவோடும் சேவிக்கவேண்டும் என்று அறிவுரை கூறினான் (யோசுவா 22:5). இந்த ஆலோசனைப் பின்னர், தேவனுடைய மனிதனாகிய யோசுவா, இஸ்ரவேல் கோத்திரத்தார் அனைவரையும் ஆசிர்வதித்து, அவர்களுடைய கூடாரத்திற்கு அனுப்பிவிட்டான். இஸ்ரவேலுக்கு வாக்குப்பண்ணின கர்த்தர் அவைகளை நிறைவேற்றினார்.

அதேவிதமாக, தேவனுடைய உழியர்கள்மூலமாக உங்களைக்குறித்தும், உங்கள் குடும்பத்தைக்குறித்தும் முன்னறிவிக்கப்பட்ட ஒவ்வொரு ஆசிர்வாதமும் நிச்சயமாகவே நிறைவேறும். தேவன் உங்களுக்குக் கொடுத்த ஆசீர்வாதங்களை உங்களுடைய கரங்களிலிருந்து எவரும் பறிக்கமுடியாது. இஸ்ரவேல் ஜனங்கள் தேவனுக்குக் கீழ்ப் படிந்தபோது யோசுவா அவர்களை ஆசிர்வதித்ததுபோன்று,இக்கடைசிநாட்களில் நீங்களும் உங்கள் குடும்பத்தினரும் இப்பூமியில் வாழும் நாட்களளவும் ஆசிர்வாதங்களைப்பெற்று, மகிழ்ச்சியோடும் சமாதானத்தோடும் வாழவேண்டுமென்று கர்த்தராகிய இயேசு கிறிஸ்து வாஞ்சிக்கிறார் . இஸ்ரவேல் புத்திரர் யோசுவாவினால் நடத்தப்பட்டது போன்று, உங்கள் வாழ்க்கையில் பரிசுத்த ஆவியானவரின் நடத்துதலுக்கு உங்களை முழுவதுமாக விட்டுக்கொடுத்து, அவருடைய ஆளுகைக்குள் அடங்கியிருக்கவேண்டும். உங்கள் வாழ்க்கையில் அவிசுவாசத்தையும் பயத்தையும் கொண்டுவர நினைக்கும் சாத்தானை மேற்கொள்ளவேண்டும். விசுவாசத்தில் அவனை எதிர்த்து நில்லுங்கள். அப்பொழுது அவன் உங்களைவிட்டு ஓடிப்போவான்.

ஜெபம் : கர்த்தாவே, உமது ஆசிர்வாதத்தினால் இப்பூமியில் ஆசிர்வதிக்கப்பட்டிருப்பேன், ஆமென்.


சிந்திக்க : நமது சுதந்திரத்திற்குள் எவரும் அத்துமீறமுடியாது .