My Daily Strength

பள்ளத்தாக்கின் லீலி -- Rev. Dr. ஜெ. சாமுவேல் சுதாகர்

இன்றைய தியானம் : 'முள்ளுகளுக்குள்ளே லீலிபுஷ்பம் எப்படியிருக்கிறதோ, அப்படியே குமாரத்திகளுக்குள்ளே எனக்குப் பிரியமானவளும் இருக்கிறாள்.' உன்னதப்பாட்டு 2:2

நம்முடைய கர்த்தருக்குக் கொடுக்கப்பட்டிருக்கிற பெயர்களில், 'பள்ளத்தாக்கின் லீலி' என்பதும் ஒன்றாகும். லீலிபுஷ்பம் முள்ளுகளுக்குள்ளே காணப்படுகிறது போல, கர்த்தர் தம்முடைய மணவாட்டியின் மேல் கொண்டிருக்கும் அன்பும் காணப்படுகிறது. லீலி புஷ்பத்தை முட்கள் குத்தும்போது அதிலிருந்து வெளிப்படும் வாசனை அநேகரைக் கவர்ந்திழுக்கிறது. அது போல கிறிஸ்துவுக்குள் காணப்படும் உங்கள் வாழ்க்கையும் பரிசுத்தமுள்ளதாயிருக்கிறது. நீங்கள் சந்திக்கும் ஒவ்வொரு சோதனையும் பரிட்சையும் உங்களைப் புடமிடுகிறது. சோதனைகளின் வழியாகக் கடந்துசெல்லும் உங்கள் வாழ்க்கையிலிருந்து வெளிப்படும் சாட்சி லீலி புஷ்பத்திலிருந்து வெளிப்படும் நறுமணம் போன்று இனிமையாயிருக்கிறது.

இப்பூமியில் நமது வாழ்க்கை சோதனைகளாலும் பரீட்சைகளாலும் நிறைந்து காணப்படலாம். ஒருவன் கிறிஸ்துவுக்குச் சாட்சியாக வாழவேண்டுமென்று விரும்பினால் அவன் தனது சிலுவையை எடுத்துக்கொண்டு கிறிஸ்துவைப் பின்பற்றவேண்டும். நம்முடைய கர்த்தராகிய இயேசு கிறிஸ்து முள்ளுகளுக்குள்ளே லீலி புஷ்பத்தைப் போல் காணப்படுகிறார். அதேவிதமாக முள்ளுகளுக்குள்ளே காணப்பட்டாலும் ஜீவ வாசனையை வெளிப்படுத்தும்படி நீங்களும் அழைக்கப்பட்டிருக்கிறீர்கள்.

தேவனுடைய சபையாகிய தமது மணவாட்டியை மீட்கும்படி தம்முடைய விலையேறப்பெற்ற இரத்தத்தைச் சிந்தி தம்மை நொறுக்கும்படி ஒப்புக்கொடுத்த கர்த்தராகிய இயேசு கிறிஸ்துவைப்போல, வாழ்க்கையில் நீங்கள் சந்திக்கும் ஒவ்வொரு சோதனையும் உங்களிலிருந்து வாசனையை வெளிப்படுத்தவேண்டும். கர்த்தராகிய இயேசு கிறிஸ்து இராஜாதி இராஜாவும் கர்த்தாதி கர்த்தராகவும் இருந்த போதும் வெட்கத்தையும் பாடுகளையும் சகித்தவராய் அடிமையின் ரூபமெடுத்தார். அவர் வையப்படும்போதும் துன்மார்க்கரால் அவமானப்படுத்தப்பட்ட வேளையிலும் உங்களையே நினைத்துக் கொண்டிருந்தார். உங்களை மீட்கவேண்டுமென்பதற்காகவே அவர் அவ்வளவு பாடுகளையும் சகித்துக் கொண்டார்.

அன்பான தேவ பிள்ளையே, முள்ளுகளின் நடுவிலிருந்து கர்த்தர் உங்களைத் தெரிந்தெடுத்திருக்கிறார். நீங்கள் சந்திக்கும் சகல சோதனைகளிலிருந்தும் வெற்றியுடன் வெளிப்பட்டு , ' மரணமே, உன் கூர் எங்கே? பாதாளமே உன் ஜெயம் எங்கே?' என்று கேட்கவேண்டுமென்று விரும்புகிறார். இந்த வேதவசனங்களைத் தியானிக்கும் வேளையில் உங்கள் இருதயத்தைச் சற்றே ஆராய்ந்து பாருங்கள். கிறிஸ்தவ வாழ்க்கை என்பது மலர்ப்படுக்கையல்ல நீங்கள் சந்திக்கும் ஒவ்வொரு சோதனையும் ஆசிர்வாதத்திற்கு நேராக உங்களை நடத்தும் பாலமாகும். உங்களைப் பெலப்படுத்தி வெற்றியுள்ளவனாக மாற்றும் சோதனைகளுக்காக தேவனை த் துதியுங்கள்.

ஜெபம் : கர்த்தாவே, சோதனைவேளைகளில் உமக்காக நறுமணம் வீசச் செய்யும். ஆமென்.


சிந்திக்க : முட்கள் கொடுக்கும் ஒவ்வொரு வேதனையும் ஆசீர்வாதங்களை வெளிக்கொண்டு வரும்.